Oksfordan kart ezilidnoidenke (2017)
Oksford (angl.: Oxford [ˈɒksfərd] «härgiden bradindsija») om Suren Britanijan lidn Anglijan keskuzpalan suves. Om Oksford-grafkundan administrativine keskuz, sen üks'jäine lidn city-statusanke.
Eländpunkt mainitase ezmäižen kerdan Angližsaksan aigkirjas vl 912 kuti jumalankodi. Kaikiš amuižemb anglijankel'žes mirus Oksfordan universitet om olmas vspäi 1117.
Oksford šingotase universitetal, avtosauvomižel (nügüd' BMW Mini) Kauli-neiborhudas lidnan suvipäivnouzmas, tedoidusil i biznesedheotandoil niiden alusel (instrumentad, mašinad, informacižed tehnologijad), pästandkodil, turizmal.
Lidn sijadase Temz-jogen randoil, jogen kümnemijläine pala nimitase Aizis:aks lidnas. Čaruell-jogi (angl.: Cherwell 64 km pitte) lankteb Temzha huralpäi lidnan territorijal. Matkad Londonhasai om 90 km suvipäivnouzmha, Börmingemhasai om 103 km lodeheze.
Klimat om ven valdmeren. Voden keskmäine lämuz om +11,1 C°, kezakun-elokun +16..+18 C°, tal'vkun-uhokun +5..+6 C°. Ekstremumad oma −17 C° i +38 C°. Paneb sadegid 681 mm vodes, läz tazomäras kuidme.
Vl 2011 lidnan eläjiden lugu oli 157 997 ristitud (grafkundan nelländez), sidä kesken läz 30 tuhad üläopenikoid.