粽子

粽子，是端午节个特色小吃，有用糯米做个，也有用精米做个，外头用芦苇、箬叶咾啥个叶子包起来，包成功长筒形或者锥形，里向好加豆沙、绿豆、赤豆、枣子、咸蛋方、冬菇、虾米、猪肉、咾啥个，隔水蒸或者摆水里向独^doq8。

吴越地区个粽子种类丰富。苏南、湖州本地主要喫“长脚粽”，也就是长筒形个粽子，用芦苇包起来，是加糖个。现在太湖地区出名个粽子是嘉兴粽，是三角锥形个，有大肉、豆沙咾啥个品种，用个是白糯米，卖嘉兴粽子个牌子也交关出名，影响周边个上海咾啥地方个粽子。温州个粽子是大米粽，三角锥个样子，有大肉、咸蛋黄、黑豆咾啥个馅头。金华会得往粽子里向加用乌饭个水泡过个糯米。永康个粽子长唻赛过座尖塔。还有地方喫个是碱水粽，也就是用草木灰汏出来个碱水泡个糯米做个粽子，里向好加馅头，也好喫白粽。