Lidnan ühthine nägu Karandil-mägenpälpäi (1050 m ü.m.t., bolg. Карандила).
Sliven (bolg.: Сливен) om Bolgarijan kahesanz' lidn eläjiden lugun mödhe. Se om Slivenan agjan administrativine keskuz.
Ezmäižed eländpunktad lidnan territorijal oliba 8 tuhad vot tagaz. Lidn oli tetab Amuižes Grekanmas kuti frakijalaižiden Asti-, Kabileti- da Seleti-heimoiden eländpunkt. Ezmäižed kirjutadud lidnan nimed oma frakijan augotižlibundanke: Tuida/Suida/Tsuida. Ottomanan imperijan aigan nimitihe İslimye, se oli agjan (vilajetan) keskuseks. Vl 1834 vatefabrik radaškanzi lidnas.
Sliven šingotase elektrižen mašiništon i elektrusen tehmižel, omblendedheotandoil (villsobad, noskad), sömtegimištol sijaližel torhudel (maid i vinmarj).
Lidn sijadase valdkundan päivnouzmas, ani suvhe Stara-Planin-mägisel'galpäi, 243 m ü.m.t. keskmäižel korktusel valdmeren pindan päl. Sliven levineb pohjoižhe Sofii — Burgas avtotespäi, matkad Sofijhasai om 300 km päivlaskmha, Burgashasai (Mustmeren rand da port) — 100 km päivnouzmha. Lähembaine järed lidn om Stara Zagor 60 km suvipäivlaskmha.
Vn 2011 Bolgarijan rahvahanlugemižen mödhe lidnan eläjiden lugu oli 91 620 ristitud. Kaikiš suremb ristitišt oli 106 212 eläjad vl 1992.
Rahvahad (2011): bolgarijalaižed — 75,2%, čiganalaižed — 6,2%, turkad — 2,9%, toižed rahvahad — 2,0%, rahvahuden ozutandata — 13,7%.